Igitego Igirubuntu Honorine ni umwe mu rubyiruko rw’Abanyarwanda rwabashije kubona akazi nyuma yo guhabwa amahugurwa ya Harambee Youth Employment Accelerator Rwanda, yamufashije kongera ubumenyi, kwigirira icyizere no kumenya gukoresha ubushobozi yari afite.
Igitego yari yararangije kaminuza afite impamyabumenyi mu bijyanye n’Itangazamakuru n’Itumanaho (Mass Media and Communication), azi indimi zitandukanye, ndetse afite n’ubunararibonye mu gufasha abakobwa bakiri bato kwiteza imbere.
Icyakora, nk’abandi benshi barangiza kaminuza, yari agihanganye n’ikibazo cyo kumenya uko yakoresha ubumenyi afite kugira ngo abone akazi gahoraho kandi kamufasha kwiteza imbere.
Uyu munsi, Igitego Honorine akora muri Vuva mu ishami rishinzwe kwamamaza no kumenyekanisha ibikorwa by’ikigo. Ni akazi yabonye nyuma yo gusoza amahugurwa ya Harambee Work Readiness Program.
Avuga ko ayo mahugurwa atamufashije kwitegura akazi gusa, ahubwo yanamufashije kuvumbura ubundi bushobozi yari afite ariko atari yarigeze aha agaciro.
Ati “Byahinduye uburyo niyumvagamo. Namenye ko mfite ubushobozi bwo kuyobora abandi, kandi ko nshobora gukomeza kubwubakiraho.”
Uko urugendo rwe rwatangiye
Igitego Honorine ni imfura mu muryango wabo, ibintu avuga ko byatumye akura yumva ko agomba kubaka ejo hazaza heza.
Mu mashuri yisumbuye yize Imibare, Ubukungu n’Ubumenyi bw’Isi (Mathematics, Economics and Geography), mbere yo gufata icyemezo cyo guhindura icyerekezo cy’amasomo.
Yaje kwiga Itangazamakuru n’Itumanaho muri Mount Kenya University.
Icyemezo cyo kwiga aya masomo yagifashe abigiriwemo inama na se wabo, wari warabonye ko afite impano mu itumanaho no kwiga indimi.
Ati “Yambwiye ko niniga itangazamakuru n’itumanaho nzabona amahitamo atandukanye arimo kwamamaza, itumanaho n’itangazamakuru.”
Icyo cyemezo cyamufunguriye amarembo yo kwiga amasomo yari ajyanye n’ibyo yakundaga.
Igitego, uvuga neza Igifaransa n’Icyongereza, yatangiye gushaka uburyo yakongera ubumenyi bwe no hanze y’ishuri.
Ageze mu mwaka wa gatatu wa kaminuza, yinjiye mu itsinda ryibandaga ku guteza imbere uburinganire, rifasha abanyeshuri kongera ubushobozi mu kuvuga inkuru, itumanaho no kwiteza imbere.
Binyuze muri iryo tsinda, yaje kwitanga nk’umukorerabushake mu nama ya African Women in Media Conference, aho yafashaga mu bikorwa by’itumanaho no kwandika inkuru zishingiye ku biganiro yagiranaga n’abanyamakuru baturutse mu bihugu bitandukanye bya Afurika.
Muri icyo gihe, yari anafite inshingano zo gufasha abakobwa bakiri bato muri gahunda yaterwaga inkunga na USAID, aho yabahaga ubumenyi ku burenganzira mu buzima bw’imyororokere no gucunga neza amafaranga.
Nubwo yumvaga ko ibyo yakoraga bifite akamaro, yari azi ko akeneye amahirwe yamufasha kwiteza imbere mu mwuga no kugira ubukungu buhamye.
Ati “Gufasha abandi kunguka ubumenyi byaranshimishaga, ariko si akazi ukora buri munsi. Nifuzaga gutera imbere mu mwuga no mu bukungu.”
Amahirwe yabonye muri Harambee
Igitego Honorine yamenye Harambee Youth Employment Accelerator Rwanda abibwiwe n’inshuti ye.
Yasabye kwitabira gahunda zayo atazi neza icyo yari ayitezeho, ariko nyuma aza guhamagarwa ngo akore isuzuma ry’ubushobozi bwe.
Yararitsinze, atoranywa mu bitabiriye amahugurwa ya Harambee Work Readiness Program, agamije gutegura urubyiruko kwinjira ku isoko ry’umurimo.
Harambee Youth Employment Accelerator Rwanda ni umuryango ufasha urubyiruko kubona amahirwe y’akazi binyuze mu kurwongerera ubumenyi bukenewe ku isoko ry’umurimo no kuruhuza n’abakoresha.
Kuva watangira gukorera mu Rwanda mu 2018, uyu muryango wakoranye n’ibigo by’abikorera, inzego za Leta n’imiryango itari iya Leta mu gushakira urubyiruko amahirwe y’akazi.
Kuri Igitego, kwitabira iyi gahunda byari amahirwe yo guhuza ubumenyi yakuye muri kaminuza n’ibikenewe mu buzima busanzwe bw’akazi.
Ati “Inshuti yanjye yambwiye ko ninyura muri gahunda ya Harambee Rwanda, izampa ubumenyi n’amahirwe nkeneye nk’umuntu ushaka akazi.”
Amahugurwa yitabiriye yamaze ibyumweru bitandatu, aho abahugurwa bigaga iminsi itanu mu cyumweru.
Yibandaga ku kubategura kugira imyitwarire n’ubumenyi bikenewe mu kazi.
Kimwe mu bintu bya mbere Honorine yize ni ukugira ikinyabupfura no kubahiriza igihe.
Abitabiraga amahugurwa basabwaga kugera aho bigira ku gihe, gukurikiza ingengabihe no kubahiriza ibikorwa byose byateganyijwe.
Ati “Muri Harambee, kubahiriza igihe byahabwaga agaciro gakomeye. Iyo umuntu yakubwiraga ko ari saa Tanu, byabaga ari saa Tanu. Gukererwa nta mpamvu ifatika byafatwaga nk’ikimenyetso cyo kutubaha abandi.”
Igitego avuga ko ibyo yize bitagarukiye mu cyumba cy’amahugurwa, ahubwo byahinduye uburyo yafataga inshingano ze n’uko yiteguraga gukorera mu bigo bitandukanye.
Yavumbuye ubushobozi yari afite bwo kuyobora
Nubwo amahugurwa ya Harambee yari agamije gutegura urubyiruko kubona akazi, Igitego avuga ko kimwe mu bintu byamufashije cyane ari ukumenya impano n’ubushobozi yari afite ariko atari yarigeze yitaho.
Abahugura ntibibandaga gusa ku byo abitabiriye amahugurwa batari bashoboye, ahubwo barebaga n’ubushobozi bafite, bakabafasha kubwongera binyuze mu myitozo no kubagira inama.
Kimwe mu bintu byagoraga Igitego Honorine ni ukuvugira imbere y’abantu benshi.
Nubwo yakundaga kwandika no kubara inkuru, kuvugira mu ruhame byaramugoraga.
Ati “Nakundaga kwandika kurusha kuvuga. Gutanga ibiganiro cyangwa imbwirwaruhame si ibintu nari menyereye.”
Abamuhuguraga bamushishikarizaga kugerageza ibintu atari amenyereye.
Iyo yabaga agezweho ngo avugire imbere y’abandi, yabanzaga kugira ubwoba no kutigirira icyizere.
Icyakora, uko yakomezaga gukora imyitozo no guhabwa inama, ni ko icyizere cye cyagendaga cyiyongera.
Hari umunsi umwe mu bamuhuguraga yamubwiye ikintu cyamufashije guhindura uburyo yibonagamo.
Yamubwiye ko afite ubushobozi bwo kuyobora abandi, ariko ko akeneye gukomeza kubwubakiraho.
Igitego yagize ati “Yambwiye ko mfite ubushobozi bwo kuyobora, ariko ko ngomba gukomeza kubuteza imbere.”
Ayo magambo yatumye atangira kwibona mu bundi buryo.
Yasobanukiwe ko kuyobora bitagarukira ku kugira umwanya cyangwa izina ry’ubuyobozi, ahubwo binajyana no kwigirira icyizere, kuvugana neza n’abandi, gufata iya mbere no kugira uruhare mu bikorwa by’ikigo.
Yarangije amahugurwa abona akazi muri Vuva
Igitego yarangije amahugurwa ya Harambee Work Readiness Program mu Ugushyingo 2024, atangira gutegereza amahirwe y’akazi ajyanye n’ubumenyi n’ibyo yakundaga.
Mu ntangiriro za 2025, Harambee Youth Employment Accelerator Rwanda yamenyesheje urubyiruko ruri mu ihuriro ryayo ko hari amahirwe y’akazi mu bijyanye no kwamamaza.
Yabyumvise vuba, ajya gukora ‘interview’ y’akazi muri Werurwe 2025, arayitsinda. Ni bwo yabonye akazi ko mu ishami rishinzwe kwamamaza muri Vuva.
Icyakora, kubona aka kazi byamuhaye indi mbogamizi kuko yari agiye gukorera mu rwego atari azi neza.
Yagombaga kwiga byinshi mu gihe gito kugira ngo abashe kuzuza inshingano ze.
Ati “Amezi atatu ya mbere yarangoye kuko ntari nzi byinshi ku rwego rw’ubucuruzi nakoragamo, ndetse nta n’abantu benshi nari nzi muri icyo kigo.”
Ubumenyi yari yarakuye mu mahugurwa ya Harambee bwamufashije kumenyera akazi gashya.
By’umwihariko, ubushobozi bwo kuvugana n’abandi bwabaye kimwe mu byamufashije cyane.
Yatangiye kujya abaza ibibazo, akamenya byinshi ku rwego rw’ubucuruzi ikigo cyakoragamo, kandi agafata iya mbere mu gutanga umusanzu aho yabonaga bishoboka.
Imbaraga yashyiraga mu kazi zaje gutuma abayobozi ba Vuva batangira kumwitaho.
Mu nama imwe y’ubuyobozi, Igitego Honorine yasubije ibibazo byabazwaga ku bigo bihanganye na Vuva ku isoko n’uko urwego rw’ubucuruzi bakoreramo ruhagaze.
Nubwo atari umwe mu bayobozi, icyizere yagaragaje n’ubumenyi yari afite byatangaje Umuyobozi Mukuru w’ikigo.
Yamushishikarije gukomeza kwitabira inama z’ubuyobozi.
Ati “Kuva uwo munsi, natangiye kujya nitabira izo nama. Byamfashije kunguka ibitekerezo no kurushaho gusobanukirwa ubucuruzi bw’ikigo.”
Ibyo byamuhaye amahirwe yo kumenya byinshi ku mikorere ya Vuva no gukomeza kwiteza imbere mu mwuga.
Harambee yafashije urubyiruko ibihumbi kubona akazi
Urugendo rwa Igitego Honorine rugaragaza intego ya Harambee Youth Employment Accelerator Rwanda yo gufasha urubyiruko kunguka ubumenyi, kwigirira icyizere no kubona aho rwahera rushaka akazi.
Uyu muryango ukorana n’abakoresha mu guhuza urubyiruko n’amahirwe y’akazi, unatanga amahugurwa agamije kuziba icyuho hagati y’ubumenyi urubyiruko rufite n’ubukenewe ku isoko ry’umurimo.
Igitego Honorine avuga ko benshi mu rubyiruko biganaga muri ayo mahugurwa babonye akazi binyuze mu mahirwe yabonetse muri Harambee.
Yibuka ko abagera kuri 20 mu bari bitabiriye icyiciro cye babonye akazi.
Kuri we ariko, impinduka ikomeye ntiyari ukubona akazi gusa, ahubwo yari ukwiyongerera icyizere mu bushobozi bwe.
Mbere yo kujya muri Harambee, yumvaga ko kubona akazi bishobora guterwa cyane no kuba umuntu afite abantu aziranye na bo.
Nyuma y’amahugurwa, yatangiye gusobanukirwa ko ubumenyi, kwitegura neza no kugira umuhate na byo bishobora gufungura amarembo y’akazi.
Uyu munsi ashishikariza urundi rubyiruko gushaka amahirwe yo kwiyungura ubumenyi ngiro, ntirugarukire gusa ku mpamyabumenyi ruvana mu mashuri.
Yagize ati “Hari igihe uba utazi ubushobozi ufite kugeza ubwo hagize umuntu ugufasha kububona.”
Kuri Igitego Honorine, gahunda ya Harambee Work Readiness Program yabaye ikiraro cyamuvanye mu cyiciro cy’urubyiruko rwarangije kwiga rugishakisha icyerekezo, imugeza ku rwego rw’umukozi ufite icyizere kandi ukomeje kubaka umwuga we.
Imibare igaragaza uruhare rwa Harambee mu Rwanda
Kuva Harambee Youth Employment Accelerator Rwanda yatangira ibikorwa byayo mu Rwanda mu 2018, imaze kubaka ihuriro ririmo urubyiruko rusaga 45.000.
Ku bufatanye n’abakoresha n’abandi bafatanyabikorwa, uyu muryango umaze kugira uruhare mu gufasha urubyiruko kubona amahirwe y’akazi arenga 7.000.
Mu mezi atandatu ya mbere ya 2026 yonyine, Harambee yafashije urubyiruko 221 kubona akazi hirya no hino mu Rwanda, barimo abakobwa 110.
Muri icyo gihe kandi, urubyiruko rushya 4.256 rwinjiye mu ihuriro ryayo, ruhabwa amahirwe yo kubona amahugurwa arutegura kujya ku isoko ry’umurimo, ubujyanama mu by’akazi n’amakuru ku myanya y’akazi ihari.
Mu bashya binjiye muri iryo huriro harimo impunzi 111 n’urubyiruko 98 rufite ubumuga.
