Muri iyi Si aho umuntu ashobora kubona amakuru mu buryo bworoshye, biratangaje kubona ko hari ibitekerezo ku buzima bwo mu mutwe bishingiye ku mitekereze itariyo bigihabwa intebe.
Iyo mitekerereze ntigira ingaruka gusa ku bakeneye gufashwa mu buryo runaka, ahubwo inatuma abantu bakomeza kwizerera mu binyoma kandi bidakwiye.
Tugiye kugaruka ku bitekerezo bitanu bitari ukuri abantu bafite ku bijyanye n’ubuzima bwo mu mutwe.
Ibibazo by’ubuzima bwo mu mutwe ni ikimenyetso cy’intege nke
Ibaze kubwira umuntu wavunitse ukuguru ngo ‘Haguruka ugende!’ Biratangaje ndabeshya? Ibi rero ni nka kwa kundi abantu babwira abandi bari guca mu bihe bikomeye bari guhura n’ibibazo by’ubuzima bwo mu mutwe ngo ‘bareke imiteto!’
Iyi ni imitekerereze iba igambiriye kugaragaza ko ibibazo by’ubuzima bwo mu mutwe ari ikimenyetso cy’imbaraga nke z’umuntu, bikagaragaza ko abari kubinyuramo baba badafite ubushobozi bwo guhangana n’ibibazo bafite.
Ibibazo by’ubuzima bwo mu mutwe biba bikwiye gukurikiranwa n’abaganga ntabwo ari ibyo abantu baba bigize.
Ishami ry’Umuryango w’Abibumbye ryita ku Buzima [OMS], rigaragaza ko umwe mu bantu bane aba afite ibyago byo guhura n’ibibazo by’ubuzima bwo mu mutwe mu buzima bwe.
Ibi bibazo biterwa n’impamvu zitandukanye zirimo izo umuntu ashobora kuvukana, imiterere y’umubiri we, aho aba kandi nta n’imwe muri izo igaragaza intege nke za muntu.
Ubuvuzi ni ubw’abantu ‘basaze’
Reba mbivuge muri ubu buryo: Tekereza uri kurohama mu mazi menshi, umuntu akakujugunyira umugozi ngo agukurure, ariko ukabyanga ngo ibyo bikorerwa abatazi koga gusa.
Ubuvuzi ‘Therapy’ akenshi bufatwa nkaho ari cyo kiba gisigaye gukorerwa abantu ‘basaze’ gusa, bigatuma gukenera ubufasha bihabwa ishusho y’uko ari ibiteye isoni.
Ubuvuzi ni ubwa buri wese. Waba ufite ibibazo bikomeye by’ubuzima bwo mu mutwe cyangwa umuhangayiko cyangwa ushaka gusa kugira imibereho myiza, kwivuza bishobora kukugirira akamaro.
Abana ntibahura n’ibibazo by’ubuzima bwo mu mutwe
Abantu benshi batekereza ko ibihe by’ubwana ari ibihe by’umutuzo, bitarangwa n’imihangayiko y’ubuzima bw’abantu bakuru. Ibi bituma umuntu atatekereza cyangwa ngo yiyumvishe ko abana bashobora guhura n’ibibazo by’ubuzima bwo mu mutwe.
Ibibazo byibasira ubuzima bwo mu mutwe bishobora kwibasira abantu b’ingeri zose, n’abana badasigaye inyuma.
Indwara zo mu mutwe ntizikunze kugaragara
Iyo indwara zo mu mutwe ziba zibasira abantu bake, Isi yari kuba ari ahantu heza cyane. Icyakora, iyo mitekerereze ituma abahura n’ibi bibazo bumva bari mu bwigunge, kuko bashobora kumva ko ari bo bonyine bahanganye n’ibibazo.
Indwara ziteza ibibazo by’ubuzima bwo mu mutwe zikunze kugaragara cyane kuruta uko wabyiyumvisha. Ishami ry’Umuryango w’Abibumbye ryita ku Buzima, OMS, rivuga ko abantu bagera kuri miliyoni 450 ku Isi bafite ibibazo by’ubuzima bwo mu mutwe.
Ikigo cyo muri Leta Zunze Ubumwe z’Amerika gishinzwe indwara zo mu mutwe [National Institute of Mental Health- NIMH], cyagaragaje ko hafi umuntu umwe muri batanu bakuze, aba arwaye indwara yo mu mutwe.
Iyi mibare yo ubwayo igaragaza ko abantu bakwiye kongererwa ubumenyi kuri izi ndwara mu buryo bushoboka ndetse hakanashyirwaho uburyo bunoze bw’ubuvuzi bwahariwe izi ndwara.
Ubishatse wabyikuramo
Iyi mitekerereze nkene ni nko kubwira umuntu urwaye asthma ngo ahumeke neza cyangwa kubwira umuntu urwaye diabetes, ngo abishatse yashyira ku rugero rushyitse isukari mu maraso ye.
Iyi mitekerereze ituma abantu bafite ibibazo byo mu mutwe bahabwa agaciro gake kandi igatuma ibyo bahura na byo byirengagizwa.
Iyo umuntu afite ibibazo by’ubuzima bwo mu mutwe kugira ngo akire bisaba ko avurwa n’abaganga babizobereyemo, agashyigikirwa kandi akabona igihe gihagije cyo kubinyuramo.
Imiti, ubuvuzi, ihinduka ry’imibereho, n’imiryango y’ubufasha ni ibintu by’ingenzi mu guha ubufasha aba bantu birengagizwa kenshi.
Nk’uko NIMH ibivuga, hari uburyo bwinshi bwiza bwo kwita ku bantu bafite ibibazo byo mu mutwe ndetse ko umuntu ashobora gukira. Ariko kandi, kwitega ko umuntu azakira binyuze mu mbaraga ze bwite n’ibyo benshi bita ubushake, ni ukudashyira mu gaciro kandi ahubwo bishobora kumugiraho ingaruka mbi kurushaho.
