Nta kiryoha nk’ibiganiro bikaba akarusho iyo biri gukorwa hagati y’urungano, baganira ku mbogamizi bahura nazo n’ibindi.
Le village de la Femme ni urugero rwiza rw’uburyo kuganira hagati y’urungano by’umwihariko abagore n’abakobwa, bishobora gutanga umusaruro bikaba umusemburo w’impinduka nziza muri sosiyete.
Le Village de La Femme ni umuryango ukorere mu mujyi wa Kigali, washinzwe na Chrystelle Intaramirwa afatanyije na Aretha M. Rwagasore.
Ni ihuriro ry’abagore n’abakobwa ba rwiyemezamirimo aho bahurira bakaganira ku mbogamizi bahura nazo n’icyo bakora ngo bahangane nazo, bahange udushya tugamije kubateza imbere n’igihugu muri rusange.
Chrystelle Intaramirwa, yavuze ko igitekerezo cyo gushinga Le Village de la Femme cyatangiye muri Mutarama 2022, bagamije gufasha abagore n’abakobwa guhangana n’ingaruka za Covid-19.
Yagize ati “Twashakaga guhura, tukigaragaza hanyuma tugakorera amafaranga, tukungurana ibitekerezo by’uburyo ubucuruzi bwabo bwatera imbere.”
Muri iri huriro, ba rwiyemezamirimo b’abagore bahawe umwanya bariyandikisha, kugira ngo babashe kwitabira, bakerekana ibyo bakora.
Alice Umubyeyi ushinzwe imenyekanishabikorwa muri sosiyete Nailcast, yavuze ko Le Village de La Femme ari igitekerezo cyiza cyane.
“Muri Village de la Femme nahahuriye n’abandi bagore ba rwiyemezamirimo. Twunguranye ibitekerezo ku buryo twarushaho guteza imbere ubucuruzi bwacu. Byanatumye tubona abandi bakiliya batari banazi ibyo dukora.”
Igiraneza Grace wo muri sosiyete Happy Farmers, yavuze ko muri Le village de la Femme bahahuriye n’abandi ba rwiyemezamirimo, bakungurana ubumenyi, ndetse bamwe bahinduka abakiliya b’abandi.
Le village de la Femme ni kimwe mu bisubizo bigamije guteza imbere abagore n’abakobwa, bahabwa urubuga rwo kugaragaza icyo bashoboye, kungurana ibitekerezo no gufashanya mu buryo bumwe cyangwa ubundi kugira uruhare rwabo mu iterambere rugaragare.
