Buri gitondo mu gihe cy’ukwezi, kuramukira ku cyo kunywa kigizwe n’indimu, tangawizi, ubuki na turmeric, byahinduye ubuzima bwanjye ari nabyo nenda kubavira imuzi muri iyi nkuru, ariko mbere na mbere reka mbanze mpere ku cyanteye kuyoboka iyo migirire.
Nayobotse iyo migirire nyuma y’uko nabonye ivugwa imyato ku rubuga rwa Instagram. Nka turmeric inaboneka ku masoko atandukanye mu Rwanda izwiho umwihariko wo gutuma uruhu rw’umuntu ruba rwiza, ikaba yanagabanyiriza umuntu ububabare.
Tangawizi yo benshi muyivuga imyato ngira ngo yanabaye inshuti ya benshi muri bya bihe by’icyorezo cya COVID-19, aho wasangaga ijyanishwa n’icyayi cyane ndetse abareba kure bakomerejeho kuko izwiho kuzanira inyungu nyinshi z’ubuzima umuntu uyimenyereje.
Ntitwabura gukomoza ku byiza by’indimu kuko zikungahaye kuri Vitamin C ifasha cyane mu kuzamurira umuntu ubudahangarwa bw’umubiri.
Ubuki ngira ngo nabwo abenshi bazi umumaro wabwo by’umwihariko ab’urungano rwanjye twakuze dusanga mu rugo hadapfa kubura agacupa kabwo gateretse ahantu. Bwifashishwa mu guhashya inkorora, gusiga ku bushye n’ibindi.
Nyuma yo kuyoboka icyo kunywa kigizwe n’ibyo byose twakomojeho, uruhu rwanjye rwongeye kugira ubuzima, ruracya rumera neza, by’umwihariko ibyo kuribwa n’imihango byajyaga binzonga bitangira gukendera.
Uretse ibyo kandi, natangiye kumva ndi umunyembaraga numva nongeye kugira imbaduko ku buryo ntari narigeze kumva umubiri wanjye ugira imbaraga nk’izo usigaye ufite nyuma yo kuyoboka icyo kinyobwa gikomatanyije kandi atari za mbaraga umuntu akomoye ku kunywa ikawa cyangwa bya binyobwa byo mu nganda byongera imbaraga.
Nibwira rero ko kuba naranyoye, ikinyobwa kigizwe na tangawizi, ubuki, indimu na turmeric bikanzanira ibyiza mu buzima bwanjye, ari nako bishobora kumerera undi wakwiyemeza gutangira igitondo cye akurikiza iyo migirire.
Nushaka, ihe icyumweru kimwe cyangwa bibiri; sinshidikanya ko umubiri wawe uzaba watangiye kukwicira akajisho ukubwira ko uri kuwugirira neza.
Niba ushobora kunywa tangawizi ukumva urushijeho kumererwa neza, ushobora kubigira akamenyero ukajya ubikora umunsi ku wundi.
Ugirwa inama yo kuyiheraho mu gitondo mbere y’uko igira ibindi ushyira mu gifu cyawe, icyakora ugasabwa kutayinywa ku gipimo cyo hejuru kuko bishobora guteza ingaruka imikorere y’umutima cyangwa bikangiza igifu kubera aside nyinshi.
Ushobora gutangirira ku gatangawizi ka santimetero eshanu kandi si ngombwa kubanza kuyihata ahubwo ukaba wabanza kuyisekura cyangwa ukayisya mu dukoresho twabugenewe ndetse mu gihe udukoresheje ukaba wakongeramo utuzi duke.
Mu gihe rero wifuza kongera akantu k’uburyohe, ushobora gukandiramo indimu, gushyiramo ubuki buke bw’umwimerere ukabinywa ako kanya utarinze kubitereka umwanya muremure.
Nawe niba hari impinduka nziza wifuza kuzana ku mubiri no mu buzima bwawe, wabigerageza ukazanshimira nyuma.
